Nisaar main teri galyon peh aye watan, keh jahan
Chali hai rasm keh koyee na sar utha kay chale
Jo koyee chahaney wala tawaaf ko niklay
Nazar chura kay chale, Jismo-jan bacha kay chale

Hain ahl-e-dil kay liye ab yeh nazm-e-bast-o-kushaad
Keh sang-o-khisht muqqayyad hain aur sag aazad
Bahut hain zulm keh dast-e-bahana-ju kay liye
Jo chund ahl-e-junoon tere naam leva hain

Baney hain ahl-e-hawas muddayee bhi, munsif bhi
Kise wakil karen, kis-se munsifi chahen

Magar Guzaarane walon kay din guzarate hain
Teray firaq mein yun subah-o-shaam kartay hain

Bujha jo raozan-e-zindan to dil yeh samajha hai
Keh teri maang sitaron se bhar gayee hogee
Chamak uthe hain salasil tou humne jaana hai
Keh ab sahar teray rukh par bikhar gayee hogee

Gharaz tasawvvur-e-shaam-o-sahar mein jeetay hai
Giraft-e-saaya-e-diwaar-o-dar mein jeetay hain

Yuhin hamesha ulajhti rahi hai zulm se khalq
Na unki rasm nayee hai, na apni reet nayee

Yuhin hamesha khilaye hain humne aag mein phool
Na unki haar nayee hai na apni jeet nayee

Isi sabab se falak ka gilaa nahin kartay
Tere firaq mein hum dil bura nahin
kartay

Gar aaj tujhse juda hain to kal baham hongey
Yeh raat bhar ki judai tou koyee baat nahin
Gar aaj auj peh hai taal-e-raqib tou kya
Yeh chaar din ki khudai tou koyee baat nahin

Jo tujhse ahad-o-wafa ustuvaar rakhtay hain
Ilaaj-e-gardishe lail-o-nihaar rakhtay hain

– Faiz Ahmed Faiz

Advertisements